L' DUCASSE

Un biau momint, ch'est l' momint dé l' ducasse.
Riche ou bin pauvr', tout l' monne est héreux.
In fait dé l' tarte, et l' gamin, l'air cocasse,
Rasin' les pron's et s'in met t' qu'à ses yeux.
Chacun s'armue. In vot l' brav' ménagère
A ses ferniêt's qu'all' met ses blancs rideaux.
In vot dins l' ru' des gins qu'ont été quère
Eun' nuèv' dépoulle ou bin un nué capiau.

El sam'di soir, in va vir les baraques,
Donner s' cop d'oeil, vettier si tout va bin.
In route in vot l' vieux marchand d' loqu's qui saque
Eun' tiot' carriol' tout rimpli' d' piaux d' lapins.
Les faiseux d' jeux fait'nt un vrai r'mu'-ménache
In abloquant leus planqu's et leus draps d'lit.
In est contint d'avoir arvu d'sus l' plache
L' cirque à tros sous et l' biau tirlibibi.

L' diminch' matin, in va r'quère à la gare
Un frèr' soldat, un oncl' du Pas-d'-Calais.
In r'vient, in bot, in d'vis d'eun' séquoi d' rare;
L' femme alle arriv' dir' qué l' dîner est prêt.
Et pis v'là l' soir. Dins tous les coins in cante.
Autour dé l' plach' les cabarets sont pleins.
Et l' faiseux d' jeux, inter ses lamp's feumantes,
Cri' comme un sourd pou ramasser les gins.

L' garchon, l' jonn' fille, in sortant d' faire eun' danse,
Ming'nt eune assiette et vont faire un p'tit tour.
El bell'-maman all' les suit à distance,
Ravett' les jeux, bâille au son du tambour.
L' couple amoureux, li, s' dandine et s'berloque
In intindant l' bell' musiqu' des qu'vaux d' bos.
L' garchon, tout fier, n' sé sint pus dins ses loques;
S' coeur i bat d' joi' comme el queu' d'un pierrot!

Mais v'là la fin: l' baraque au pain d'épices
Est assiégé' pa tous les tiots infants.
In leu z'acate un tambour, eun' bêtisse:
Faut fair' plaisi aux p'tits comme à les grands.
L'un est contint; l'autre i brait après s' mère
Paç' qu'all' trouv' point un quévau d' bos qui vit.
Un autre i s' sauve: il est poursui pa s' père:
I-a d'jà cassé l' chien dé s' pétit fusil!

Jules Mousseron, "Fleurs d'en bas", 1897