L'INSPIRATION

L'homme inspiré qui busie in tâchant
D' réaliser les biaux rêv's qu'i-a dins l' tiête,
Eprouve ainsi l' bonheur el pus touchant,
L' don d'inchant'mint del bésonn' du poète.

L' pinseur sans dout' n'est point à l'ais' tout l' temps.
L' flot des idé's l'illumine ou l'inquiète,
Mais i découvre in ces pénibl's instants
L' fleur du poèm' qui li met l' âme in fiête.

L' soif ed créer l' saoule autant qu' du bon vin;
S' coeur i rayonn' d'un frémiss'mint divin,
Comme in amour, tant qu'il est pur incore.

Insorcell'mint délicieux à bénir,
Flamme épuisant', qué tout poète adore,
Té charm' la vi', mêm' quand all' va finir.

Jules Mousseron, "Dans nos mines de charbon", 1946