L' PATOIS

J'ai fort quière el français - ch'est l' pus joli langache -
Comm' j'aime el biau vêt'mint qué j' mets dins les honneurs;
Mais j' préfèr' min patois, musiqu' dé m' premier âche,
Qui, chaqu' jour, fait canter chu qu'a busié min coeur.

Dins l' peine, un mot patois nous consol' davantache;
Dins l' joie, à l' bonn' franquette, i corse el bonne humeur.
Il est l' pus bell' rinscontre au cours d'un long voïache,
L' pus douch' plaint' du soldat au mitan des horreurs.

L' patois s'apprind tout seul, et l' français, à l' école.
L' un vient in liberté, l' autr' s'intass' comme un rôle.
Les deux sont bons, bin sûr, mais not' patois, pourtant,

Rapelle' mieux les souv'nirs d'eun jeunesse effaçée.
L' patois ch'est l' fleur sauvag' pus qu'eune autr' parfeumée.
Ch'est l' douche appel du soir d'eun' mère à ses infants.

Jules Mousseon, "Autour des terris", 1929